ÚLTIMO AVISO PARA PARTICIPAR NO "ENREGUÉIFATE 2020"

 

O 29 de maio pecha o prazo para participar no Enreguéifate 2020

Malia a estado de alarma, o Enreguéifate botou a andar este ano para animar a pequenos/as e maiores a pasar o tempo agudizando o enxeño a través da arte da regueifa. 

Enreguéifate é un proxecto de normalización lingüística impulsado polos concellos de Pontevedra, Ames, Rianxo, Santiago de Compostela e Teo que apoia a difusión da improvisación oral en verso (regueifa) para contribuír, por medio dela, á promoción do uso da lingua galega. Neste camiño, Enreguéifate súmase ao labor que xa veñen realizando diversas entidades públicas e privadas, así como moitas persoas do ámbito cultural e do ensino.

O obxectivo principal deste proxecto é que a cidadanía entre en contacto coa improvisación oral en verso a través da experiencia de regueifar. Por iso, inclúe accións formativas, un certame regueifeiro e un encontro anual de regueifa.

O concurso consta de dúas categorías:

- Xeral, na que pode participar calquera persoa. 

- Escolar, na que pode participar alumnado de ensino non universitario (calquera nivel de educación infantil, primaria, secundaria, formación profesional, ensinanzas especiais, artísticas, escolas de música, de danza ou de idiomas). Nesta categoría, as persoas participantes representarán o centro eucativo no que estuden, aínda que poden inscribirse co nome da súa aula ou co que decidan adoptar para diferenciárense doutras que participen do mesmo centro. 

O prazo de inscrición está aberto ata o 29 de maio. Toda a información, así como a formulario para inscribirse, está na web: www.enregueifate.gal